ದೀಪಾವಳಿ

ಮೇಷ್ಟ್ರ ಜೊತೆ ಒಂದಷ್ಟು ಹೊತ್ತು...

2010-11-05T06:59:00.000-07:00

ಚಿತ್ರ ರಂಗದ ಪ್ರೀತಿಯ ಮೇಷ್ಟ್ರು ಸಾಹಿತ್ಯ ಲೋಕದ ಪ್ರೀತಿ ಹುಡುಗ, ಹೊಸ ಕನಸುಗಳಿಂದ ಹೊಸ ಪ್ರಯೋಗಗಳ ಮೂಲಕ ಸದಾ ಜನಮಾನಸದಲ್ಲಿ ಉಳಿದ ನಿರ್ದೇಶಕ ನಾಗತಿಹಳ್ಳಿ ಚಂದ್ರಶೇಖರ ಮಾತಿಗಿಳಿದರೆ ಅದೊಂದು ಅನುಭವ ಬುತ್ತಿ. ಪ್ರತಿ ತುತ್ತಿನಲ್ಲು ಆಳವಾದ ಪಾಂಡಿತ್ಯದ ಸವಿ, ಅವರೊಂದಿಗಿನ ಅನೌಪಚಾರಿಕ ಮಾತು ಕತೆಯಲ್ಲಿ ತುಳುಕಿದ ಚಿತ್ರಬದುಕಿನ ಸಿಹಿ ಖಾರ ಹೂರಣ ಇಲ್ಲಿದೆ. ಈ ಕನಸು ದೀಪಾವಳಿ ಸ್ಪೆಷಲ್ ಗಾಗಿ ಈ ಸಣ್ಣ ಸಂದರ್ಶನ.

ಪ್ರಶ್ನೆ;ಕನ್ನಡದಲ್ಲಿ ಒಳ್ಳೆಯ ಚಿತ್ರಗಳು ಬರುತ್ತಿಲ್ಲ ಅನ್ನೋ ಪ್ರೇಕಕ್ಷರ ಬಗ್ಗೆ ನಿವೇನನ್ನುವಿರಿ?
ಕನ್ನಡ ಚಿತ್ರಗಳನ್ನು ಜನ ವೀಕ್ಷಿಸುವ ದೃಷ್ಟಿ ಬದಲಾಗಿದೆ.ಪ್ರತಿಯೊಂದು ಚಿತ್ರವನ್ನು ಪ್ರಯೋಗ ತರ ವೀಕ್ಷಿಸುವ ಕಲೆಯನ್ನು ಪ್ರೇಕ್ಷಕ ಬೆಳೆಸಿಕೊಳ್ಳಬೇಕು,ಒಳ್ಳೆಯ ಚಿತ್ರಗಳು ಬಂದಾಗ ಕೆಲವಾರು ಪೇಕ್ಷಕರಿಗೆ ಕಾರಣಾಂತರಗಳಿಂದ ಅವುಗಳ ಅರಿವೇ ಇಲ್ಲದಿರುದು ದುರದೃಷ್ಟಕರ.ಚಿತ್ರದ ಸೋಲುಗೆಲುವು ಚಿತ್ರದ ಗುಣಮಟ್ಟವನ್ನು ನಿರ್ಧರಿಸುವುದಿಲ್ಲ.

ಪ್ರಶ್ನೆ: ಕಲಾತ್ಮಕ ಚಿತ್ರಗಳು ಕಡಿಮೆಯಾಗುತ್ತಿದೆ ಎಂಬುದರ ಬಗ್ಗೆ ನಿಮ್ಮ ಅಭಿಪ್ರಾಯಗಳು ?
ಚಿತ್ರಗಳನ್ನ ಕಲಾತ್ಮಕ ಅಥವಾ ಕಮರ್ಷಿಯಲ್ ಎಂದು ಗುರುತಿಸುವ ಮಾನದಂಡ ಬದಲಾಗಬೇಕು. ಆ ಮಾನದಂಡದಲ್ಲಿ ಗೊಂದಲಗಳಿರುವುದರಿಂದಲೇ ಕೆಲವೋಂದು ಚಿತ್ರಗಳು ಕಲಾತ್ಮಕತೆ ಕಮರ್ಷಿಯಲ್ ಚಿತ್ರಗಳ ಪಟ್ಟಿಗೆ ಸೇರಲ್ಪಡುತ್ತದೆ.

ಪ್ರಶ್ನೆ: ಎಂದಿರನ್ನ ಸಾಧನೆ,ಬೇರೆ ಭಾಷೆಯ ಚಿತ್ರಗಳಿಗೆ ಒಲಿಯಲು ಸಾದ್ಯವೇ?
ಎಂದಿರನ್ ಎಂಬುವುದು ಬಲು ಅಪರೂಪದ ಚಿತ್ರ.ಇಂತಹ ಚಿತ್ರಗಳು ಚಿತ್ರರಂಗದ ಹೆಗ್ಗುರುತುಗಳಾಗಿ ಮಾರ್ಪಡುತ್ತವೆ.ಆದರೆ ಈ ಚಿತ್ರಗಳು, ಸಿನಿಮಾರಂಗವು ಸಮಸ್ಯೆಗಳಿಂದ ಮುಕ್ತವಾಗಿವೆ ಎಂಬ ಸೂಚನೆ ನೀಡುವುದಿಲ್ಲ.

ಪ್ರಶ್ನೆ:ಕೆಲವೂಮ್ಮೆ ಇತರ ಭಾಷ ಚಿತ್ರಗಳ ಪೈಪೋಟಿಯಲ್ಲಿ ಕನ್ನಡ ಸಿನಿಮಾರಂಗ ಮಂಕಾಗುತ್ತದೆ ಎನ್ನುತಾರಲ್ಲ?
ಹಾಗೇನೂ ಇಲ್ಲ ಯಾವಗಲೂ ದೂರಾದ ದಂಡೆ ಹಸಿರೆನಿಸುವುದು ಸಹಜ. ಬೇರೆ ಭಾಷೆ (ತಮಿಳು) ಚಿತ್ರರಂಗದ ಸ್ಥಿತಿಯು ಚಿಂತಾಜನಕವಾಗಿದೆ ಅಲ್ಲೂ ಸಮಸ್ಯೆಗಳಿವೆ ಆದರೆ ಬೆಳಕಿಗೆ ಬರುವುದು ಕಡಿಮೆ.
ಪ್ರಶ್ನೆ: ಇಂದು ಚಿತ್ರರಂಗಕ್ಕೆ ಬರುತ್ತಿರುವ ಬಹುತೇಕರ ಕಥೆ ಬಂದ ಪುಟ್ಟ ಹೋದ ಪುಟ್ಟ ಎಂಬಂತಿದೆಯಲ್ಲ ?
ಇಂದಿನ ಸಿನಿಮಾರಂಗದಲ್ಲಿ ಸ್ಪರ್ಧೆ ಹೆಚ್ಚುತ್ತಿದೆ ಅದರೆ ಸ್ಪರ್ಧೆಯನ್ನು ಮೀರಿ ನಿಲ್ಲುವ ಪ್ರತಿಭೆಗಳು ಬರುತ್ತಿಲ್ಲ, ಹಾಗೆ ಬಂದರೂ ಎಲ್ಲೋ ಕೆಲವೆಡೆ ಅದೃಷ್ಟಕೈಕೊಡುತ್ತದೆ. ಉತ್ತಮ ನಟನೇ ಇರುವ ಚಿತ್ರಗಳು ತೋಪಾಗುತ್ತವೆ. ಎಲ್ಲಕ್ಕಿಂತ ಮುಖ್ಯವಾಗಿ ಏನೋ ಹುಚ್ಚು ಆಕರ್ಷಣೆಯಿಂದ ಚಿತ್ರರಂಗದೆಡೆಗೆ ಧಾವಿಸಿ ಬರುವ ಯುವ ಪೀಳಿಗೆಯಲ್ಲಿ ಹಿಂದಿನ ನಟರ ಶ್ರದ್ಧೆಯಾಗಲೀ , ತೊಡಗಿಸಿಕೊಳ್ಳುವಿಕೆಯಾಗಲೀ ಕಾಣಬರದಿರುವುದು ಇಂತಹ ಸಮಸ್ಯೆಗೆ ಕಾರಣ.

ನಿಮ್ಮ ಹೊಸ ಯೋಜನೆ ಯೋಚನೆ?
ಪ್ರತೀ ವರ್ಷ ಚಿತ್ರಾಸಕ್ತರಿಗೆ ಅಭಿವ್ಯಕ್ತಿ ವೇದಿಕೆಯಡಿ ಚಿತ್ರಶಿಬಿರಗಳನ್ನು ಏರ್ಪಡಿಸುತ್ತಿದ್ದು ನಲುವತ್ತು ವಿದ್ಯಾರ್ಥಿಗಳಲ್ಲಿ ಇದರಲ್ಲಿ ಭಾಗವಹಿಸುವ ಅವಕಾಶವಿದೆ. ಯುವ ಚಿತ್ರ ಪ್ರತಿಭೆಗಳಿಗೆ ಉತ್ತಮ ತರಬೇತಿ ನೀಡುವ ಉದ್ದೇಶವನ್ನು ಈ ಶಿಬಿರ ಹೊಂದಿದೆ.

ಜಯಲಕ್ಷ್ಮಿ ಆಳ್ವ

ಕವನ

2010-11-05T06:48:00.001-07:00

೧. ತನುವು ಮೀಟಿತು ಮತ್ತೆ ಮಧುರ ಗಾನ

ಒಂದಿರುಳ ಕನಸಿನಲು, ನನ್ನ ಬಳಿ ನೀನಿರಲು

ಹೃದಯ ಹಾಡಿತು ತಾನೇ ಹರುಷ ರಾಗ

ಮನದಾಳದಲ್ಲೆಲ್ಲ ಸಂತಸವು ಉಕ್ಕಿರಲು

ತನುವು ಮೀಟಿತು ಮತ್ತೆ ಮಧುರ ಗಾನ

ಚಿಗುರು ಚಿಗುರಲಿ ಬರೆದ ಮಾಸದಕ್ಷರದೊಲೆ

ಪ್ರಕೃತಿ ಬರೆಸಿತು ಅಲ್ಲೇ ಒಲವಿನೋಲೆ

ಮತ್ತೆ ಮರ ಮರದಲ್ಲಿ ಕೋಗಿಲೆಯ ಸವಿಗಾನ

ಕನಸ ಕನ್ಯೆಯ ಕೆನ್ನೆ ಕಂಪು ನೆನಪು

ನೆನಪು ನೆನಪಲಿ ಪ್ರೀತಿ ಹಸಿರು ಹಸಿರಾದಾಗ

ಸಂತಸದ ಚಿಲುಮೆಯೇ ಚಿಮ್ಮಿತಾಗ

ಭಾವನೆಯ ಲೋಕದಲೇ ಪ್ರೀತಿ ಪ್ರೇಮದ ಪರ್ವ

ವಾಸ್ತವವು ಮರೆಸೀತು ಅದರ ಮರ್ಮ

ನಮ್ಮ ಪ್ರೀತಿಯ ಕಂಡು ವಿಶ್ವವೇ ಬೆರಗಾಗೆ

ಇರುಳ ಕನಸಿದು ಮತ್ತೆ ಮೆಲುಕೊ ಹಾಗೆ

ವಿಶ್ವ ಮಾನವ ಪ್ರೀತಿ ಸರಳ ಸುಂದರ ಬದುಕು

ಪ್ರಕೃತಿ ಕಲಿಸುವ ಪಾಠ ಇದುವೇ ನಿಜಕೂ

೨ .ಅಮ್ಮ

ನನ್ನ ಎದೆಯಾಳದಲಿ ಬಚ್ಚಿಟ್ಟ ಕನಸಿನಲೂ

ಕಂತು ಕಂತಿಗು ನಿನ್ನ ನೆನಪಿನಳಲೂ

ಎಲ್ಲ ನೋವನು ತನ್ನ ಮನದಲ್ಲೇ ಬಚ್ಚಿಟ್ಟು

ಹೊರಗೆ ಅರಳುವೆ ನೀನು ಪ್ರೀತಿ ಕೊಟ್ಟು

ಮಧುರ ನಿನ್ನಯ ಲಾಲಿ ನನ್ನ ಕಿವಿಗಳಿಗಿಂಪು

ಮತ್ತೆ ಬಿಸಿಯುಸಿರ ಆ ಪ್ರೀತಿಯೊಂಪು

ಇನಿದನಿಯ ಜೋಗುಳದ ಅಕ್ಕರೆಯ ಕುಡಿನೋಟ

ಒಲವಿನಕ್ಕರೆಯ ಆ ತುತ್ತಿನೂಟ

ಮಗುವಿನಕ್ಕರೆಯ ತೊದಲು ನುಡಿಗಳ ತಂಟೆ

ವಿಶ್ವಕೋಶದಕ್ಕರಕೂ ಕಡಿಮೆಯುಂಟೇ

ಬದುಕಿನೋಣಿಯ ತುಂಬ ಒಲುಮೆಯಮೃತ ಹನಿಸಿ

ನನ್ನ ಭಾಗ್ಯವ ಬರೆದೆ ಪ್ರೀತಿಯುಣಿಸಿ

ಮನೆಯ ಕಜ್ಜದ ಹೊರೆಯ ಹೊತ್ತು ಪ್ರೀತಿಯ ಹೊಸೆದು

ನನ್ನ ಬೆಳೆಸಿದೆ ನಿನ್ನ ನೆತ್ತರೆರೆದು

ಉಕ್ಕಿತೆನ್ನಯ ಅಕ್ಷಿಪಟಲದಾಚೆಯು ನಿತ್ಯ

ಇಳೆಯ ದೇವರು ನೀನೆ ಸತ್ಯ ಸತ್ಯ

ಕಣ್ಣಾಳದಲ್ಲೆಲ್ಲ ಹರಿಯಿತೊಲುಮೆಯ ಜಲವು

ನಿನ್ನ ತ್ಯಾಗವ ನೆನಸಿ ಅಮ್ಮ ನಿಜವು

ನಿನ್ನ ಸೇವೆಯ ಋಣವ ನಾ ಹೇಗೆ ತೀರಿಸಲಿ

ನಿನ್ನಮ್ಮನಾಗಿ ನಾ ಮತ್ತೆ ಬರಲೇ

೩. ಗ್ರೀಷ್ಮ ವಸಂತ

ಬಾಳ ಗ್ರೀಷ್ಮದ ಪಥದೆ, ಪ್ರೀತಿ ಬದುಕಿನ ಮರವೇ

ನಲ್ಲೆಯೊಲವಿನ ಮತ್ತೇ ನೆರಳಿನಂತೆ

ಚಿಗುರಿದೆಲೆಯಾ ಮರದ ಹಳೆಯ ಬೇರಿನ ನೆನಪೇ

ಒಲವಿನುಯ್ಯಾಲೆಯನೇ ಜೀಕಿದಂತೆ

ಎದೆಯ ಭಾವನೆ ಬಸಿರು ರಾಗ ತಾನದ ಉಸಿರು

ತನುವು ತನುವಲಿ ಬೆರೆತ ನೆನಪೆ ಹಸಿರು

ಕಾಲ ಕಾಲಕೂ ನಿಲುವ ಮನದ ಬಯಲಲಿ ಸಿಗುವ

ಅವಳ ಚೆಲುವಿನ ಸಿರಿಯು ಹರಿವ ತನುವ

ಕೋಗಿಲೆಯ ಪಂಚಮದ ಮಧುರ ಮಂಜುಳ ಗಾನ

ನಮ್ಮ ಒಲವಿನ ಸವಿಯ ಕುರುಹು ತಾನ

ಹಳೆಯ ನೆನಪಿನ ಬುತ್ತಿ , ಬಿಚ್ಚಿ ತೆನ್ನನು ಮುತ್ತಿ

ಮನೆ ಮನದ ತುಂಬೆಲ್ಲಾ ನೆನಪು ಸುತ್ತಿ

ಪ್ರೀತಿ ನೆಮ್ಮದಿ ಭರಿತ ಬದುಕೇ ಸಾರ್ಥಕ ಪಥವು

ಸ್ನೇಹದೊಲವಿನ ನೆರಳಲಿನ್ನು ಹರಿವು

ಉಕ್ಕಿ ಹರಿಯಲಿ ಒಲವು ವಿಶ್ವ ದೊಳಗೆಲ್ಲೆಲ್ಲೂ

ಪ್ರಕೃತಿ ಮನುಜನ ಸನಿಹ ಬಾಳ್ವೆಯಲ್ಲೂ

೪. ಮೊದಲ ಚೈತ್ರದ ಒಲವು

ಚೈತ್ರದುಯ್ಯಾಲೆಯನು ಜೀಕಿ ಅರಸಿತು ಮನವು

ಚಿಗುರಿನೆಲೆಯೆಲೆಯಲ್ಲಿ ಪ್ರೇಮ ಲೀಲೆ

ಹಸಿರುಡುವ ಪ್ರಕೃತಿಯ ನೋಡಿ ದಣಿಯದು ಮನವು

ಪ್ರೇಮದಲರಿನ ಮತ್ತ ಕಂಪಿನಲ್ಲೆ

ಅಲ್ಲಿ ಮರಮರದಲ್ಲಿ ಹೂಗಳೆದೆಯೆಡೆಯಲ್ಲಿ

ಮತ್ತೆ ಬರೆಸೀತು ಆ ಪ್ರೇಮ ಕಾವ್ಯ

ಕೋಗಿಲೆಯ ಪಂಚಮವು ನಿಶೆಯನೇರಿಸುತಿರಲು

ಮಂದ ಅನಲವು ಹರಡಿ ಕಂಪು ಸೂಸೇ

ನೀರ ಜುಳುಜುಳು ರವವು ಜತೆಯ ರಾಗವ ಪಾಡೆ

ಭಾವದುಯ್ಯಾಲೆಯಲಿ ರಾಸಲೀಲೆ

ಕನಸ ಕನ್ಯೆಯ ಸನಿಹ ಮತ್ತು ಎರೆಯಿತು ನಿಶೆಯ

ನನ್ನ ಕನ್ಯೆಯ ಕೆನ್ನೆ ತಂಪು ಕಂಪು

ಹಸಿರು ಸೀರೆಯ ಒಡತಿ ಪ್ರೇಮ ಕಾವ್ಯದ ಕನ್ಯೆ

ಮನವು ಜಾರುವ ನೆಪವು ಬೇರೆ ಬೇಕೇ

ಪ್ರಕೃತಿ ಪುರುಷರ ಸ್ನೇಹ ಇಳೆಯ ನಿತ್ಯದ ನಿಯಮ

ಮೊದಲ ಚೈತ್ರದ ಒಲವಿಗೆಣೆಯು ಉಂಟೇ

5 ಸೋಲೇ ಗೆಲುವಿನ ಮೊದಲ ಮೆಟ್ಟಿಲ

ದಾಟುವೆನೆಂದೂ ತುಂಬಿದ ನದಿಯ

ತೀರದೆ ಕುಳಿತರೆ ದುರ್ಲಭವೇ

ಅಲ್ಪ ಸ್ವಲ್ಪವೇ ದಿನವೂ ಕಲಿಯೇ

ಈಜಿ ದಾಟಲು ಸುಲಭವೆ

ಕಲಿಯುವ ಆಸೆ ನಿನ್ನಲಿ ಬಲಿತರೆ

ಕಷ್ಟವೂ ಇಷ್ಟವೇ ಅನಿಸುವುದೂ

ಆಸೆಯ ನಿಗೃಹ ಬೆಳೆಸುತ ಕಲಿತರೆ

ಸಾರ್ಥಕ ಬದುಕೂ ಹನಿಸುವುದು

ಸೋಲೇ ಗೆಲುವಿನ ಮೊದಲ ಮೆಟ್ಟಿಲು

ಸಾಧಕ ಗುರಿಯನು ಮುಟ್ಟಲು

ಸತತ ಪರಿಶ್ರಮ ಸಾರ್ಥಕ ಬಟ್ಟಲು

ಯಶಸ್ಸು ಕೀರ್ತಿಯನು ಕಟ್ಟಲು

ಕಲಿವದು ಎಂದಿಗೂ ಮುಗಿಯದ ಆಟ

ಬದುಕಿನ ಅಂತಿಮ ಘಳಿಗೆಗೂ ಪಾಠ

ದಿನದಿನ ಹೊಸತನ ಕಲಿವುದೇ ರೀತಿ

ಪ್ರಕೃತಿಯ ಅಣು ಅಣು ಕಲಿಸದೇ ನೀತಿ

ಬೆಳ್ಳಾಲ ಗೋಪಿನಾಥ ರಾವ್

ಜಾಗತೀಕರಣದ ತಲ್ಲಣಗಳು

2010-11-05T06:45:00.000-07:00

      ಈ ಕನಸು    ಸಂಪರ್ಕಕ್ಕೆ ಬರುವುದಕ್ಕೆ ಮುಂಚಿನ ದಿನ ನೆಟ್ನಲ್ಲಿ ಏನೂ ಮಾಡುವುದೆಂದು ಯೋಚಿಸುತಾ ಗೂಗಲ್ ನಲ್ಲಿ ನನ್ನ ಹಳ್ಳಿಯ ಹೆಸರನ್ನು ಕೊಟ್ಟೆ . ಒಂದೇ ಲಿಂಕ್ ದೊರೆಯಿತು "ಕಗಲಗೊಂಬದಲ್ಲಿ ಸರ್ಕಾರ     ಕಾಖಾ೯ನೆ   ನಿರ್ಮಾಣಕ್ಕೆ ತಿರ್ಮಾನಿಸಲಾಗಿದೆ ." THE HINDU "   ಪತ್ರಿಕೆಯಲ್ಲಿ ಪ್ರಕಟವಾದ ಲೇಖನದ ಪ್ರತಿ ಅದು .ಅದನ್ನು ಓದಿದ ನಾನು ದಂಗಾಗಿಹೋದೆ ,ಏನೂ ತಳಮಳ ಕಸಿವಿಸಿ ಉರಿನಲ್ಲಿ ಏನೇನು ಕಳೆದುಕೊಂಡು ಬಿಡುತ್ತೇನೆ    ಕಳೆದುಕೊಳ್ಳುದಕಿಂತ ಹೆಚ್ಚಾಗಿ ಕಸಿದುಕೊಳ್ಳುತ್ತಾರೆ ಎನ್ನೂ ಹೆದರಿಕೆ .ಹಿಂದುಳಿದ ಜಿಲ್ಲೆ    ಬಾಗಲಕೋಟದಲ್ಲಿ    ಕಾರ್ಖಾನೆ ನಿರ್ಮಾಣ ಯಾಕಪ್ಪಾ? SPELLING    ಏನಾದರು ತಪ್ಪಾಗಿದೆಯಾ ನೋಡಿದೆ . ಜಾಗತೀಕರಣ ತಲ್ಲಣಗಳು ಹಲವಾರು   ಶಾಲೆಗೆ    ಹೋಗುವಾಗ ನಾಟಿ ಕೋಳಿಗಳು ತಮ್ಮ ಮರಿಸೇನೆದೊಂದಿಗೆ ಆಹಾರ ಹೆಕ್ಕುವುದನ್ನು ನೋಡುವುದು ವಿಶಿಷ್ಟವಾಗಿತ್ತು ,ಈಗ   ನಾಟಿ ಕೋಳಿಗಳು ಕಾಣುವುದೆ ಅಪರೂಪ ಇತ್ತೀ ಚೆಗೆ ರಸ್ತೆ   ಬದಿಯಲ್ಲಿ ಜನ ಸೇರಿರುವುಡನ್ನು ಕಂಡು ನೋಡಿದರೆ ಜಾಲಿಗೆಯಲ್ಲಿ ಜೋಡಿ ಕೋಳಿಮರಿಗಳನ ಮಾರಾಟ !! Dad wonderfull amazing    ಮಾತುಗಳು ಕೇಳಿಸುತಿದ್ದವು . ಅಜ್ಜ   ತತ್ರಾಣಿ { ಸಣ್ಣ ಮಣ್ಣಿನ ಕುಡಿಕೆ } ಹೆಗಲಿಗೇರಿಸಿಕೊಂಡು ಹೊಲಕ್ಕೆ ಹೋಗತ್ತಿ ದ್ದರು ಬಾಟಲಿಗಳ    ಹಾವಳಿಯಲ್ಲಿ ತತ್ರಾಣಿ ಮಾಯವಾಗಿದೆ .ಇವೆಲ್ಲ ಸಹಜ ಬದಲಾವಣೆಗಳೇ? ಆದರೆ ಇದನ್ನು ಒಪ್ಪಿಕೊಳ್ಳುವಲ್ಲಿ ನನಗೆ ಕಳವಳ .ನನ್ನ ಹಳ್ಳಿ ಹಳ್ಳಿಯಾಗಿ ಉಳಿಯಬೇಕೆಂಬ ಅದಮ್ಯ ಆಸೆ ಅದಕ್ಕೆ ಅಲ್ಲಿ ಇನ್ನೊಂದು ಹೊಸದಾಗಿ ರಸ್ತೆಯಾಗುತ್ತಿದೆ ಇನ್ನೇನೂ ಬಾಗಲಕೋಟ ಎಂಟು ಕಿ. ಮಿ ವೆಂದಾಗ ಆಘಾತಕ್ಕೆ
ಒಳಗಾಗುತ್ತೆ ನೆ . ನಮ್ಮ ಹೊಲಗಳನ್ನು ಸರ್ಕಾರವು ಆಕ್ರಮಿಸಿಕೊಂಡು ಫ್ಲಾಟ್ ಮಾಡುತ್ತಾರೆ ವೆಂಬಮಾತುಗಳು ಕೇಳಿಬರುತ್ತಿವೆ ನಮ್ಮ ಹೊಲವು ಬೇರೆವರೆ ಆಸ್ತಿಯಾಗಿ    ಉತ್ತುವ ಭೂಮಿ ಮಾಯವಾಗಿ ಅಲ್ಲಿ ನಮ್ಮ    ಹೊಲವಿತ್ತೆಂಬ ಕುರುವು ಮಾಯವಾಗುವುದೆಂಬುದನ್ನು ನೆನಸಿಕೊಂಡರೆ ಬಹಳ ಸಂಕಟವಾಗುತ್ತದೆ.    ಈ ವಿಷಯ ಅಪ್ಪನಿಗಿ ತಿಳಿದಾಗ ಒಂದು ಕೋಟಿ ಕೊಟ್ಟರು      ಈ   ಹೊಲ ಸಿಗುವುದಿಲ್ಲ .    ಹೊಲ    ತಟ್ಟೆ ಇದ್ದ ಹಾಗೆ    ಮಾರಲಾಗುವುದಿಲ್ಲ ವೆನ್ನುತ್ತಾರೆ . ನಮ್ಮ   ಹೊಲ ಹಳ್ಳಿ ಹಾಗೆ ಉಳಿಯಬೇಕೆಂಬ ಆಸೆ. ಈ ಸಣ್ಣ ಆಸೆ ನೆರವೆರುವುದೇ ಓದುಗರೇ ?

ಸುನೀಲ ದಾಸಪ್ಪನವರ

ಜಾತಕ ದೋಷ

2010-11-04T20:03:00.000-07:00

ಕಥೆ
ಭೀಮ ಜೋಯಿಸರ ಮನೆ ಜೆಂಬ್ರ ಎಂದರೆ ಕೇಳಬೇಡ. ಹೊನ್ನೂರಿನ ಜನಕ್ಕೆ ಅಂದು ಗಡಿಬಿಡಿ... ಊರಿಗೆ ಊರೇ ಜೋಯಿಸರ ಮನೆಯ ಚಪ್ಪರದಡಿ ಸೇರಿದ್ದರು. ಚಪ್ಪರ ತುದಿಯಲ್ಲಿ ಇಟ್ಟಿದ್ದ ಶರಬತ್ತಿನ ಹಂಡೆ ಖಾಲಿಯಾಗುತ್ತಿದ್ದುದೇ ಗೊತ್ತಾಗುತ್ತಿರಲಿಲ್ಲ. ಆಸರಿಕೆ ಉಸ್ತುವಾರಿ ಹೊತ್ತಿದ್ದ ಜೋಯಿಸರ ಸೋದರ ಅಳಿಯ ಉದನೇಶ್ವರನಿಗೆ ಆಗಾಗ ಅಡಿಗೆ ಭಟ್ಟರಿಗೆ ಹೇಳಿ ನಿಂಬೆ ಶರಬತ್ತು ಮಾಡಿಸುವುದೇ ಕೆಲಸವಾಗಿತ್ತು. ಅಡಿಗೆ ಕೊಟ್ಟಿಗೆಗೆ ಒಮ್ಮೆ, ಚಪ್ಪರದ ಕಡೆಗೊಮ್ಮೆ ಹೆಗಲಿನಿಂದ ಬೀಳುತ್ತಿದ್ದ ಶಾಲು ಹೆಗಲಿಗೇರಿಸಿಕೊಂಡು ಓಡಾಡುತ್ತಿದ್ದ ಉದನೇಶ್ವರ ತನ್ನ ಮೇಷ್ಟ್ರುಗಾರಿಕೆಯ ಇಲ್ಲೂ ತೋರಿಸುತ್ತಿದ್ದ.
ಮುಂಡಾಸು ಕಟ್ಟಿಕೊಂಡು ಕಚ್ಚೆ ಹಾಕಿದ್ದ ಜೋಯಿಸರು ಮದುವೆ ಮಂಟಪದಲ್ಲಿ ಹೆಂಡತಿ ಶಾರದೆಯ ಜೊತೆ ಕೂತು ಅಲ್ಲಿಂದಲೇ ಬಂದವರನ್ನು ವಿಚಾರಿಸಿಕೊಳ್ಳುತ್ತಿದ್ದರು. ಭವಾನಿ ಸ್ಟುಡಿಯೋದ ಫೋಟೋಗ್ರಾಫರ್‌ ಫೋಟೋ ಕ್ಲಿಕ್ಕಿಸುತ್ತಿದ್ದ. ಇದರ ನಡುವೆ ಶಾರದೆಗೆ ಹೊಸ ಪಟ್ಟೆ ಸೀರೆಯ ಸೆರಗು ಎಷ್ಟು ಸರಿ ಮಾಡಿದರೂ ಸಾಕಾಗುತ್ತಿರಲಿಲ್ಲ. ಮಂಟಪದಲ್ಲಿ ಎರಡೂ ಕಡೆಯ ಭಟ್ಟರ ಮಂತ್ರ ತಾರಕ್ಕೇರುತ್ತಿತ್ತು. ಮದುಮಗಳು ಲಚ್ಚಿ (ಲಕ್ಷ್ಮಿ) ಸಾಕ್ಷಾತ್‌ ಲಕ್ಷ್ಮಿಯ ಹಾಗೇ ಕಾಣುತ್ತಿದ್ದಳು. ಅವಳ ಪಕ್ಕ ನಿಂತಿದ್ದ ವರ ವಾಸುದೇವ ಮಾತ್ರ ಲಕ್ಷ್ಮಿಯ ರೂಪಿನ ಮುಂದೆ ಕೊಂಚ ಮಂಕಾಗಿ ತೋರುತ್ತಿದ್ದ. ಆದರೂ ಮದುಮಗನ ಮುಂಡಾಸು, ಕಚ್ಚೆ ಹಾಕಿದ್ದರಿಂದ ಅಲ್ಪ ಮಟ್ಟಿಗೆ ಕಳೆ ಬಂದಿತ್ತು.
ಜೋಯಿಸರ ವಿಶಾಲ ಅಂಗಳದಲ್ಲಿ ಹಾಕಿದ್ದ ಚಪ್ಪರದಲ್ಲಿ ಜನ ತುಂಬಿ ತುಳುಕುತ್ತಿತ್ತು. ಜೋಯಿಸರ ನೆಂಟ್ರು, ಕೂಟು ಸ್ವಲ್ಪ ದೊಡ್ಡದೇ. ಹೀಗಾಗಿ ಅವರ ಒಬ್ಬಳೇ ಮಗಳ ಮದುವೆಗೆ ಜನ ಜಾತ್ರೆ ಭಾರೀ ದೊಡ್ಡದಿತ್ತು. ಚಪ್ಪರದ ಅಡಿಕೆ ಮರದ ಕಂಬಕ್ಕೆ ಒರಗಿ ನಿಂತು ಗಂಡಸರ ಅಡಿಕೆ ರೇಟು, ಕರಿಮೆಣಸು ಬೆಳೆ ಕೈಕೊಟ್ಟಿದ್ದರ ಚರ್ಚೆ ಮಾಡುತ್ತಿದ್ದರು. ಮನೆಯ ಹೊರ ಜಗುಲಿಯ ಮೇಲೆ ಚಾಪೆ ಹಾಸಿಕೊಂಡು ಕೂತಿದ್ದ ಹೆಣ್ಮಕ್ಕಳು ಸೀರೆ, ಚಿನ್ನ, ಉಪ್ಪಿನಕಾಯಿ, ಹಪ್ಪಳ ಎಂದು ವರನ ಕಡೆ ವಧುವಿನ ಕಡೆ ಎಂಬ ಬೇಧಭಾವವಿಲ್ಲದೆ ಪಟ್ಟಾಂಗ ಹಾಕುತ್ತಿದ್ದರು. ಇನ್ನು ಕೆಲವರಿಗೆ ತಮ್ಮ ಮಗನಿಗೆ ಸೂಕ್ತ ಜೋಡಿ ಹುಡುಕುವ, ಜಾತಕ ವಿಚಾರಿಸುವ ಕೆಲಸ.. ಇದರ ನಡುವೆ ಮಕ್ಕಳ ಗಿಲ್‌ ಗಿಲ್‌ ಆಟ..
ತೆರೆ ಸೀರೆ ಸರಿದಾಗ ವರ-ವಧು ಪರಸ್ಪರ ಹೂ ಮಾಲೆ ಹಾಕಿಕೊಂಡರು. ಅವರನ್ನು ಜೊತೆಯಾಗಿ ನೋಡುತ್ತಿದ್ದ ಉದನೇಶ್ವರನ ಕಣ್ಣು ಯಾಕೋ ಮಂಜಾಯಿತು. ಅಷ್ಟು ಹೊತ್ತು ಉತ್ಸಾಹದಿಂದ ಓಡಾಡುತ್ತಿದ್ದವನ ಕಾಲು ಯಾಕೋ ಈಗ ಒಂದು ಕಡೆ ಹೂತು ಹೋಯಿತು. ಒಂದು ಕೈನಿಂದ ಲೋಟದಲ್ಲಿ ಶರಬತ್ತು ತುಂಬಿ ಕೊಡುತ್ತಿದ್ದರೂ, ಮನಸ್ಸು ಮಾತ್ರ ಹಿಂದಿನ ನೆನಪಿಗೆ ಹೊರಳಿತ್ತು.
ಜೋಯಿಸರಿಗೆ ಇರುವುದು ಒಬ್ಬಳೇ ಮಗಳು. ಬೇರೆ ಸಂತಾನವಿಲ್ಲ. ಹೀಗಾಗಿ ಮದುವೆ ಮನೆಯಲ್ಲೇ ನಡೆಯಬೇಕೆಂದು ನಿರ್ಧಾರ ಮಾಡಿದ್ದರು ಜೋಯಿಸರು. ಲಚ್ಚಿಗೆ ಈಗ 21 ರ ವಯಸ್ಸು. ಮಗಳನ್ನು ಪಿಯುಸಿವರೆಗೆ ಓದಿಸಿದ್ದರು ಜೋಯಿಸರು. ನಂತರ ವರಾನ್ವೇಷಣೆ ಶುರು ಮಾಡಿದ್ದರು. ಆದರೆ ಯಾಕೋ ಅವಳ ಜಾತಕದಲ್ಲಿದ್ದ ಕುಜದೋಷ ಅವಳಿಗೆ ಎಲ್ಲಿಯೂ ಕಂಕಣ ಕೂಡಿಬರುತ್ತಿರಲಿಲ್ಲ. ಹುಡುಕಿ ಹುಡುಕಿ ಸೋತಿದ್ದರು ಜೋಯಿಸರು. ಎಲ್ಲಿ ಜಾತಕ ಕೊಟ್ಟರೂ ಕೂಡಿ ಬರೋದಿಲ್ಲ ಎಂಬ ಉತ್ತರ ಕೇಳಿ ಕೇಳಿ ಲಚ್ಚಿಗೂ ಮದುವೆ ಬಗ್ಗೆ ಬೇಸರ ಬಂದಿತ್ತು.
ಇದರ ನಡುವೆಯೇ ಉದನೇಶ್ವರ ಲಚ್ಚಿಗೆ ಹತ್ತಿರವಾಗಿದ್ದ. ಉದನೇಶ್ವರ ಜೋಯಿಸರ ತಂಗಿ ಸಾವಿತ್ರಿಯ ಮಗ. ಅಂದರೆ ಸಂಬಂಧದಲ್ಲಿ ಸೋದರಳಿಯ. ಲಚ್ಚಿಗೆ ಬಾವ. ಅದೇ ಊರಿನಲ್ಲಿ ಪ್ರೈಮರಿ ಶಾಲೆ ಮೇಷ್ಟ್ರು. ಲಚ್ಚಿಗೂ ಅವನಿಗೂ ಐದು ವರ್ಷ ಅಂತರ. ಚಿಕ್ಕಂದಿನಿಂದಲೂ ಲಚ್ಚಿಯ ಮೇಲೆ ಅವನ ಮನಸ್ಸು. ಜೊಯಿಸರ ಮನೆಗೆ ಬಂದಾಗಲೆಲ್ಲಾ ಲಚ್ಚಿಯನ್ನು ಹೊಳೆ ದಂಡೆಗೆ ಕರೆದುಕೊಂಡು ಹೋಗಿ ನರಸಿಂಹ ಸ್ವಾಮಿಯವರ ಸಿರಿಗೆರೆಯ ನೀರಿನಲಿ ನಿನ್ನ ಹೆಸರು... ಎಂದು ರಾಗವಾಗಿ ಹಾಡಿ ಅವಳನ್ನು ರಂಗೇರಿಸುತ್ತಿದ್ದ. ಅಷ್ಟರಲ್ಲೇ ಲಚ್ಚಿಯ ಹೆಸರು ಅವನ ಮನದಲ್ಲಿ ಅಚ್ಚಾಗಿತ್ತು. ಆದರೆ ಲಚ್ಚಿಗೆ ಬಾವನ ಮನದಲ್ಲೇನಿದೆ ಗೊತ್ತಾಗುವಷ್ಟು ಪ್ರೌಢಿಮೆ ಇರಲಿಲ್ಲ.
ಉದನೇಶ್ವರನಿಗೆ ಮೇಷ್ಟ್ರ ಕೆಲಸ ಪರ್ಮನೆಂಟಾಗುವ ಹೊತ್ತಿಗೆ ಲಚ್ಚಿಯ ಜಾತಕ ಅಲ್ಲಿ ಇಲ್ಲಿ ಕೊಡಲು ಪ್ರಾರಂಭಿಸಿದ್ದರು ಜೋಯಿಸರು. ಇದೇ ಸೂಕ್ತ ಸಮಯ ಅಂತ. ಅಮ್ಮನ ಬಳಿ ತನ್ನ ಮನದಾಸೆ ಹೇಳಿದ್ದ ಉದನೇಶ್ವರ. ಎಷ್ಟಾದರೂ ಅಣ್ಣನ ಮಗಳು. ಕಣ್ಣ ಮುಂದೆ ಬೆಳೆದ ಹುಡುಗಿ. ಹೀಗಾಗಿ ಇವಳನ್ನೇ ಮನೆ ಸೊಸೆಯನ್ನಾಗಿ ಮಾಡುವುದರಲ್ಲಿ ತಪ್ಪಿಲ್ಲ ಎನಿಸಿತ್ತು ಅವರಿಗೂ. ಆದರೆ ಗಂಡ ಪರಮೇಶ್ವರ ಭಟ್ಟರು ಮುಂಗೋಪಿ.. ಅವರನ್ನು ಒಪ್ಪಿಸುವುದು ಸುಲಭವಾಗಿರಲಿಲ್ಲ. ಆದರೆ ಮಗನ ಆಸೆಯನ್ನು ಆಚೆ ಹಾಕುವಂತಿಲ್ಲ. ತವರಿನ ನಂಟು ಬಿಡುವ ಮನಸ್ಸೂ ಇಲ್ಲ. ಹೀಗಾಗಿ ಅತ್ತು ಕರೆದು ಭಟ್ಟರನ್ನು ಒಪ್ಪಿಸಿದ್ದರು. ಕೊನೆಗೆ ಜಾತಕ ನೋಡಬೇಕೆಂದು ಶರತ್ತು ಹಾಕಿದ್ದರು.
ಅಲ್ಲೇ ಎಡವಟ್ಟಾಗಿದ್ದು. ಲಚ್ಚಿಯ ಜಾತಕದಲ್ಲಿ ಕುಜದೋಷ ಇದೆ ಅಂತ ಜಾತಕ ನೋಡಿದ ಜೋಯಿಸರು ಹೇಳಿದ್ದರು. ಇಂತಹ ದೋಷ ಇರುವವರಿಗೆ ಇದೇ ದೊಷ ಇರುವ ಹುಡುಗ ಆಗಬೇಕು. ಇಲ್ಲವಾದರೆ, ಪತಿ ಪತ್ನಿ ಸುಖವಾಗಿರೋದಿಲ್ಲ. ಅಥವಾ ಗಂಡನ ಜೀವಕ್ಕೆ ಅಪಾಯ ಎಂದು ಖಡಾಖಂಡಿತವಾಗಿ ಹೇಳಿದ್ದರು.
ಭಟ್ಟರಿಗೂ ಇಂತಹದ್ದೊಂದು ನೆಪ ಬೇಕಿತ್ತು. ಸೋದರಿಕೆ ಮದುವೆಯಾಗುವುದು ಅವರಿಗೆ ಸ್ವಲ್ಪವೂ ಇಷ್ಟವಿರಲಿಲ್ಲ. ಅಲ್ಲದೆ, ಗೌರ್ನಮೆಂಟ್‌ ಕೆಲಸದಲ್ಲಿರುವ ಮಗನಿಗೆ ಪಿಯುಸಿ ಓದಿದ ಹುಡುಗಿಯನ್ನು ಗಂಟು ಹಾಕುವ ಯೋಚನೆ ಅವರಿಗೆ ಸ್ವಲ್ಪವೂ ಇಷ್ಟವಿರಲಿಲ್ಲ. ಕಳ್ಳನಿಗೊಂದು ಪಿಳ್ಳೆ ನೆವ.. ಈ ಮದುವೆ ಸಾಧ್ಯವಿಲ್ಲ ಎಂದು ಕೈಯಾಡಿಸಿದ್ದರು. ಜಾತಕ ದೋಷ ಮುಚ್ಚಿಟ್ಟ ಜೋಯಿಸರ ಮೇಲೆ ಅವರಿಗೆ ಒಳಗೊಳಗೇ ಅಸಮಧಾನವಿತ್ತು. ಕೊನೆಗೂ ಅವರ ಹಠವೇ ಗೆದ್ದಿತು. ಶಾಸ್ತ್ರ-ಸಂಪ್ರದಾಯ ಅಂತ ನಂಬಿಕೆ ಇಡುವ ನಾವು ಗೊತ್ತಿದ್ದೂ, ಗೊತ್ತಿದ್ದೂ ಇಂತಹ ಮದುವೆಗೆ ಮುಂದಾಗೋದು ಬೇಡ ಅಂತ ಜೋಯಿಸರು ತೀರ್ಮಾನಿಸಿದರು.
ಇಷ್ಟೆಲ್ಲಾ ರಂಪಾಟ ಆಗಿ ಮೂರು ವರ್ಷ ಆಯ್ತು. ಉದನೇಶ್ವರನ ಜೀವನದಲ್ಲಿ ಏನೆಲ್ಲವೋ ಆಗಿ ಹೋಯ್ತು. ಅಪ್ಪ-ಅಮ್ಮನ ಒತ್ತಾಯಕ್ಕೆ ತಾವರೆಕೆರೆಯ ಹುಡುಗಿ ರಾಜಿಯ ಕೈ ಹಿಡಿದಿದ್ದ. ಅವಳು ಒಳ್ಳೆಯವಳೇ. ಉದನೇಶ್ವರ ಹಿಂದಿನ ಪ್ರೇಮ ಕತೆ ಎಲ್ಲಾ ಗೊತ್ತಿದ್ದೂ, ಅವನ ಮಡದಿಯಾಗಲು ಒಪ್ಪಿದ್ದಳು. ಮೊದ ಮೊದಲು ಲಚ್ಚಿಯ ನೆನಪಲ್ಲಿದ್ದ ಉದನೇಶ್ವರನಿಗೆ ತನ್ನ ಜೀವನದಲ್ಲಿ ಹೊಸ ಹೆಣ್ಣನ್ನು ಸ್ವೀಕರಿಸಲು ಕಷ್ಟವಾಯಿತು. ಆದರೆ ಅವಳ ಶಾಂತ ಸ್ವಭಾವಕ್ಕೆ ಕೊನೆಗೂ ಅವನ ಮನಸೋತಿತ್ತು. ಈ ನಡುವೆ ಅವನಿಗೆ ಉತ್ತರ ಕರ್ನಾಟಕದ ಕಡೆಯ ಕುಗ್ರಾಮವೊಂದಕ್ಕೆ ವರ್ಗವಾಗಿತ್ತು. ಇದರೊಂದಿಗೆ ಉದನೇಶ್ವರ ಗ್ರಹಚಾರ ಕೆಟ್ಟಿತ್ತು.
ಮನೆಯ ಹಿತ್ತಲಲ್ಲಿದ್ದ ಕಟ್ಟೆಯಿಲ್ಲದ ಬಾವಿಯಿಂದ ನೀರು ಸೇದಲು ಹೋಗಿದ್ದಾಗ ಹಸಿ ಮಣ್ಣಿನಲ್ಲಿ ಅಡಿಯಿಟ್ಟದ್ದೇ ರಾಜಿಯನ್ನು ಬಾವಿ ನುಂಗಿ ಹಾಕಿತ್ತು. ಮತ್ತೊಮ್ಮೆ ಉದನೇಶ್ವರ ಜೀವನದಲ್ಲಿ ಬಿರುಗಾಳಿಯೆದ್ದಿತ್ತು. ಹಾಗೂ, ಹೀಗೂ ಹಳಿಗೆ ಬರುತ್ತಿದ್ದ ಅವನ ಬದುಕು ಮತ್ತೆ ಹಳ್ಳ ಸೇರಿತ್ತು. ಜಾತಕ ನೂರಕ್ಕೆ ನೂರು ಕೂಡಿ ಬರುತ್ತದೆಂದು ಜೋಯಿಸರಿಂದ ಹೇಳಿಕೆ ಪಡೆದುಕೊಂಡು ಆಗಿದ್ದ ವೈವಾಹಿಕ ದುರಂತದಲ್ಲಿ ಅಂತ್ಯವಾಗಿತ್ತು. ಶಾಸ್ತ್ರ, ಜಾತಕ ಎಂದು ಹಾರಾಡುತ್ತಿದ್ದ ಅಪ್ಪನಿಗೂ ಈಗ ಮಾತೇ ಇಲ್ಲದಾಯ್ತು. ಮಗನ ಜೀವನವನ್ನು ನಾವೇ ಕೈಯಾರೆ ಹಾಳು ಮಾಡಿಕೊಂಡೆವಲ್ಲಾ ಅಂತ ಅಮ್ಮ ಪ್ರತಿದಿನ ಕಣ್ಣೀರು ಹರಿಸಿದ್ದಾಯ್ತು. ಇನ್ನೆಂದೂ ನನ್ನ ಜೀವನದಲ್ಲಿ ಮತ್ತೊಂದು ಮದುವೆಯಿಲ್ಲ ಎಂಬ ತೀರ್ಮಾನಕ್ಕೆ ಬಂದಿದ್ದ ಉದನೇಶ್ವರ.
ಇದರ ನಡುವೆ ಲಚ್ಚಿಗೆ ಮಂಗಳೂರಿನಲ್ಲಿ ಇಲೆಕ್ಟ್ರಿಕಲ್‌ ಶಾಪ್‌ ಇಟ್ಟುಕೊಂಡಿದ್ದ ವಾಸುದೇವನ ಜೊತೆ ಕಂಕಣ ಬಲ ಕೂಡಿ ಬಂದಿತ್ತು. ಅಲ್ಲಿಗೆ ಉದನೇಶ್ವರನ ಕನಸು ಕಮರಿ ಹೋಗಿತ್ತು. ಆದರೆ ಮಾವನ ಮಗಳ ಮದುವೆಗೆ ಹೋಗದೇ ಇದ್ದರೆ, ನೆಂಟ್ರು ಬಾಯಿಗೆ ಬಂದಿದ್ದು ಹೇಳಿಯಾರು ಅಂತ ಬಂದಿದ್ದ. ಆದರೆ ಮದುವೆ ಮಂಟಪದಲ್ಲಿ ಲಚ್ಚಿಯನ್ನು ಬೇರೆಯವನೊಂದಿಗೆ ನೋಡಲು ಕಷ್ಟವಾಗುತ್ತಿತ್ತು. ಅದಕ್ಕೆ ಚಪ್ಪರದ ಇನ್ನೊಂದು ಮೂಲೆಯಲ್ಲಿ ಶರಬತ್ತಿನ ಕಾಯಕಕ್ಕೆ ನಿಂತಿದ್ದ.
ಯಾರೋ ಇನ್ನೊಂದು ಲೋಟ ಶರಬತ್ತು ಬೇಕೆಂದು ಕೇಳಿದಾಗ ಉದನೇಶ್ವರನಿಗೆ ಇಹಲೋಕದ ಅರಿವಾಗಿತ್ತು. ಅವನ ಬೆನ್ನ ಹಿಂದೆ ನಿಂತು ಮಾತನಾಡುತ್ತಿದ್ದ ಇಬ್ಬರು `ಎಷ್ಟು ಚೆಂದದ ಹುಡುಗಿ! ವರ ಮಾತ್ರ ಯಾಕೋ ಹೇಳಿ ಮಾಡಿಸಿದಾಂಗಿಲ್ಲ..' ಅನ್ನುತ್ತಿದ್ದರೆ.. ಅದಕ್ಕೆ ಉತ್ತರವಾಗಿ ಇನ್ನೊಬ್ಬಾತ `ಏನು ಮಾಡೋದು? ಜಾತಕ ದೋಷ ಇತ್ತು ನೋಡಿ. ಜೋಯಿಸರು ಎಷ್ಟು ಕಡೆ ಹುಡುಕಿದ್ರು.. ಎಲ್ಲದಕ್ಕೂ ನಾವು ಕೇಳಿಕೊಂಡುಬರಬೇಕು' ಎಂದು ಅನುಕಂಪ ಸೂಚಿಸುತ್ತಿದ್ದರು.. ಹೌದು ಎಲ್ಲದಕ್ಕೂ ಅದೃಷ್ಟ ಬೇಕು ಎಂದು ತನ್ನಲ್ಲೇ ವಿಷಾದ ನಗೆ ನಕ್ಕ ಉದನೇಶ್ವರ.
-ಶಾರ್ವರಿ

ದೀಪಾವಳಿಯ ಶುಭಕಾಮನೆಗಳು...

2009-10-18T07:11:00.000-07:00

ಕೊಟ್ಟಿಗೆಯೂ ಮೆಣಸ್ಕಾಯಿಯು...

2009-10-18T06:16:00.000-07:00

ಕರಾವಳಿಯಲ್ಲಿ ದೀಪಾವಳಿಗೆ ಬರ ನೆರೆಯ ಛಾಯೆ ಒಂದಷ್ಟು ಸೋಕಿದೆಯಾದರೂ ಸಾಂಪ್ರದಾಯಿಕ ದೀಪಾವಳಿ ಆಚರಣೆಗೇನೂ ತೊಂದರೆಯಾಗಿಲ್ಲ... ದೀಪಾವಳಿಯ ದ್ವಿತೀಯ ದಿನದಂದು ಕೊಟ್ಟಿಗೆ ಮೆಣಸ್ಕಾಯಿಯ ಸಂಭ್ರಮ. ಕರಾವಳಿ, ಕಾಸರಗೋಡು, ದಕ್ಷಿಣ ಕನ್ನಡದ ಬಹುಭಾಗಗಳಲ್ಲಿ ಇಂದಿಗೂ ಸಾಂಪ್ರದಾಯಿಕ ಆಚರಣೆ ನಡೆಯುತ್ತಿದೆ.
ಮೊದಲ ದಿನ ಎಣ್ಣೆ ಸ್ನಾನ ಮಾಡಿ ದೋಸೆ ಅಥವಾ ಶ್ಯಾವಿಗೆ ತಿಂಡಿ ತಿಂದರೆ ದ್ವಿತೀಯ ದಿನದಂದು ಉದ್ದಿನ ಕೊಟ್ಟಿಗೆಯ ಸವಿ ಸವಿಯುವ ಉತ್ಸಾಹ...ಅದಕ್ಕಾಗಿ ಸಿದ್ಧತೆಗಳು... ಅಮ್ಮ ಮುನ್ನಾದಿನವೇ ಬೇಕಾದ ತಯಾರಿಯನ್ನು ಭರ್ಜರಿಯಾಗಿ ಮಾಡಿರುತ್ತಾರೆ... ಮನೆ ಹಿರಿಯರ ಸಹಕಾರ...ಕಿರಿಯರ ಉತ್ಸಾಹ... ಮನೆಯೆಜಮಾನ ತೋಟದಿಂದ ಬಾಳೆ ಕೊಯ್ದು ತಂದರೆ , ಮನೆಯ ಹೆಣ್ಣು ಮಕ್ಕಳು ಬಾಳೆಯನ್ನು ಬೇಕಾದ ಆಕಾರಕ್ಕೆ ತುಂಡರಿಸಿ, ಒಲೆಯಲ್ಲಿ ಬಾಡಿಸಿ, ಬಾಳೆ ನೂಲನ್ನು ತೆಗೆದು `ಕೊಟ್ಟೆ'(ಮುಡೆ)ಕಟ್ಟುವ ಕಾಯಕಕ್ಕೆ ಕೈಯಿಕ್ಕುತ್ತಾರೆ... ಅದಾದ ನಂತರ ಹದಬಂದ ಉದ್ದು ಅಕ್ಕಿ ಹಿಟ್ಟನ್ನು ಕೊಟ್ಟೆಯೊಳಗಿಟ್ಟು ಕಟ್ಟಲಾಗುತ್ತದೆ.... ಆದಾದ ನಂತರ ಪಾತ್ರೆಯೊಳಗಿಟ್ಟು ಕೊಟ್ಟಿಗೆಯನ್ನು ಬೇಯಿಸಲಾಗುತ್ತದೆ...
ಇಷ್ಟೇ ಅಲ್ಲ...ಈ ಕೊಟ್ಟಿಗೆಗೆ ರಸಾಯನ(ಸಿಹಿ, ಒಂದು ವಿಧದ ಪಾಯಸ)ಅಥವಾ ಹಾಗಲ ಕಾಯಿಯ ಮೆಣಸ್ಕಾಯಿ(ಖಾರವಾದ ಸಾಂಬಾರು)ಸಿದ್ಧಪಡಿಸುತ್ತಾರೆ. ಶುದ್ಧ ತೆಂಗಿನೆಣ್ಣೆ ಹಾಕಿ ಬಿಸಿ ಬಿಸಿ ಕೊಟ್ಟಿಗೆಯನ್ನು ಮೆಣಸ್ಕಾಯಿಯೊಂದಿಗೆ ಸವಿಯುವುದೇ ಒಂದು ಖುಷಿ...ವ್ಹಾವ್...ಈ ಬಾರಿಯ ಕೊಟ್ಟಿಗೆ ಸಿದ್ಧವಾಗಿದೆ... ರುಚಿ ಮೆಲ್ಲೋಣ...ನೀವೂ ಬರ್ತೀರಾ....
- ವರ್ಷ

ದೀಪಾವಳಿಯ ಸಂದೇಶ...

2009-10-17T10:30:00.001-07:00

Vivek: : ಈ ದೀಪಾವಳಿ.. ಸಾಲು ದೀವಿಗೆಯ ಜ್ಯೋತಿಯಲ್ಲಿ ಬೆಳಕಾಗಲಿ ನಿಮ್ಮ ದಾರಿ, ಜೊತೆಗೆ ಬದುಕೇ ಕಾಣದ ಜೀವಗಳಿಗೂ ಇದೇ ಆಗಲಿ ಸಹಕಾರಿ! Wishin u and ur family a very Happy diwali..

ದೀಪಾವಳಿ ಸಂಭ್ರಮ...

2009-10-17T08:47:00.000-07:00

ದೀಪಗಳ ಹಬ್ಬ ದೀಪಾವಳಿ ಇಂದಿನಿಂದ ಆರಂಭಗೊಂಡಿದೆ. ನಾಡಿನಾದ್ಯಂತ ಜನತೆ ಸಂಭ್ರಮದಿಂದ ದೀಪಾವಳಿ ಆಚರಿಸುತ್ತಿದ್ದಾರೆ. ಕರಾವಳಿಯಲ್ಲಿ ದೀಪಾವಳಿ ಆಚರಣೆಯ ಒಂದು ನೋಟ ಇಲ್ಲಿದೆ.
ಚಿತ್ರಗಳು: ನಾಡೋಡಿ.

ಶುಭಾಶಯಗಳು...

2009-10-17T02:34:00.000-07:00

ನಿಮಗೆಲ್ಲರಿಗೂ ದೀಪಾವಳಿಯ ಶುಭಾಷಯಗಳು...

ಎ.ಕೃಷ್ಣ ಭಟ್

ಶುಭ ಸಂದೇಶ

2009-10-17T02:27:00.000-07:00

ದೀಪಾವಳಿಯ ಶುಭಾಶಯಗಳು...

ಸುಧೀರ್ ಕುಮಾರ್ ವೈ.ಟಿ

ಶುಭ ಸಂದೇಶ...

2009-10-17T02:19:00.000-07:00

ಪ್ರೀತಿಯ ಸಂದೇಶಗಳು...

2009-10-17T02:15:00.000-07:00

ಬೆಳಕಿನ ಹಬ್ಬ ದೀಪಾವಳಿ

ಬದುಕಲ್ಲಿ ತುಂಬ ಮುದವರಳಿ

ಜಾಜ್ವಲ್ಯಮಾನ ಅಭಿರುಚಿಯ ತಂದು

ಉಜ್ವಲತೆ ಇರಲಿ ಎಂದೆಂದೂ.

ಶುಭಾಶಯಗಳು
- ಎಚ್.ಮುರಳೀ ಕೃಷ್ಣ, ಕಾಸರಗೋಡು.

ಮನವೆಂಬ ಮಾಯಾಮೃಗ

2009-10-16T22:42:00.000-07:00

`ಮನಸ್ಸು' ಈ ಮೂರಕ್ಷರ ಪದಕ್ಕೆ ಅಷ್ಟೊಂದು ಶಕ್ತಿ, ಸಾಮರ್ಥ್ಯವಿದೆ. ಮನದ ಅಸ್ತಿತ್ವವಿರುವುದು ಗೊಂದಲದಲ್ಲಿ. ಆದರೆ ಇದರ ನಿಯಂತ್ರಣವಾದಾಗಷ್ಟೇ ಯಾವೊಂದು ಕಾರ್ಯವೂ ಸುಗಮವಾಗಲು ಸಾಧ್ಯ. ಮನದ ನಿಗ್ರಹಕ್ಕೆ, ನಿಯಂತ್ರಣಕ್ಕೆ ಪ್ರಯತ್ನಿಸುವುದು ತೀರಾ ಅಗತ್ಯ..'

ಹೀಗೆನ್ನುತ್ತಾರೆ ಧೀಷ್ಮಾ ಡಿ.ಶೆಟ್ಟಿ.

`ಮನಸ್ಸು' ಇದು ಶರೀರದ ಎಲ್ಲಾ ಕ್ರಿಯೆಗಳನ್ನು ನಿಯಂತ್ರಿಸುವ ಒಂದು ಸಾಧನ. ಇದರ ಆಕಾರ, ಗಾತ್ರ ಬಲ್ಲವರಿಲ್ಲ. ಆದರೆ ಮನುಷ್ಯನ ಬದುಕಿನಲ್ಲಿ ಇವು ನಿರ್ವಹಿಸುವ ಪಾತ್ರ ಮಾತ್ರ ಅಗಾಧವಾದುದು...

ಆರೋಗ್ಯಪೂರ್ಣ ಶರೀರವಿದ್ದರೆ ಆರೋಗ್ಯಪೂರ್ಣ ಮನಸ್ಸಿರುತ್ತದೆ. ಈ ಮಾತು ಅನಾದಿಕಾಲದಿಂದಲೂ ಪ್ರಚಲಿತದಲ್ಲಿದೆ.

ಇದಕ್ಕೆ ತದ್ವಿರುದ್ಧವಾಗಿ ಮನಸ್ಸು ಕೆಟ್ಟಾಗ ಜೊತೆ ಜೊತೆಗೆ ದೇಹಾರೋಗ್ಯವೂ ಹದಗೆಡುತ್ತದೆ. ನಿರಾಶೆ ಮನದಲ್ಲಿ ಮನೆಮಾಡುತ್ತದೆ. ಮನವೆ ಎಲ್ಲ ಕಾರ್ಯಕ್ಕೂ ಮೂಲ. `ಮನಸ್ಸಿದ್ದರೆ ಮಾರ್ಗ', `ಮನ ಏವ ಮನುಷ್ಯಾಣಾಂ ಬಂಧನಂ ಕಾರ್ಯ ಮೋಕ್ಷಯೋ:', `ಆಸ್ ವಿ ಥಿಂಕ್ ಸೋ ವಿ ಆರ್ ', `ಮನಗೆದ್ದು ಮಾರುಗೆಲ್ಲು' ಎಂಬ ನಾಣ್ನುಡಿಗಳನ್ನು ದಿನಂಪ್ರತಿ ನಾವು ಕೇಳುತೇವೆ... ಓದುತ್ತೇವೆ,. ಆದರೆ ಮನವೆಂಬ ಮರ್ಕಟವನ್ನು ನಿಯಂತ್ರಿಸುವುದು ಮಾತ್ರ ಕಷ್ಟದ ಕೆಲಸವಾಗಿದೆ.

ಮನಸ್ಸೆಂಬ ಮಾಯಾಮೃಗವನ್ನು ಹದ್ದು ಬಸ್ತಿನಲ್ಲಿಡುವುದು ಕಷ್ಟ. ಈ ಮಾತು ಒಪ್ಪತಕ್ಕಂತಹುದು. ಆದರೆ ಬದುಕಿನಲ್ಲಿ ಸುಖ ಅನುಭವಿಸಬೇಕಾದರೆ ಕಷ್ಟಪಡುವುದು ಅಷ್ಟೇ ಅನಿವಾರ್ಯವೂ ಹೌದು. ಮನೆಯ ಟಿ.ವಿಗೆ ರಿಮೋಟ್ ಕಂಟ್ರೋಲ್ ಇರುತ್ತದೆ. ಆದರೆ ಮನದ ಟಿ.ವಿಗೆ ಅದು ಬೇಡವೇ? ಇಂದಿನ ಪಬ್, ನೆಟ್, ಜೆಟ್ ಸಂಸ್ಕೃತಿಯಲ್ಲಿ ಮನೋನಿಗ್ರಹ ಎಂಬುದು ಅನಿವಾರ್ಯವಲ್ಲವೇ?

ಮನಸ್ಸೆಂಬುದು ಪ್ಯಾರಾಚೂಟ್ ಇದ್ದಂತೆ. ಪ್ಯಾರಾಚೂಟ್ ಬಿಚ್ಚಿಕೊಂಡರೆ ಮಾತ್ರ ಅಪಾಯದಿಂದ ಪಾರಾಗಲು ಸಾಧ್ಯ. ಅದು ಮುಚ್ಚಿಕೊಂಡೇ ಇದ್ದರೆ ಅದು ಕೈಯಲ್ಲಿದ್ದು ವ್ಯರ್ಥ,ದುರಂತವೆಂಬುದು ಕಟ್ಟಿಟ್ಟ ಬುತ್ತಿ.

ಮನಸ್ಸು ಕೂಡಾ ಹಾಗೆಯೇ... ಮನದ ಕಿಟಕಿ, ಬಾಗಿಲುಗಳನ್ನು ತೆರೆದಿದ್ದು ನಾವು ಗಾಳಿಯನ್ನು ಸ್ವಾಗತಿಸಬೇಕು. `ನಹಿ ಜ್ಞಾನೇನ ಸದೃಶಂ' ಜ್ಞಾನಕ್ಕೆ ಸಮಾಜವದುದು ಯಾವುದೂ ಇಲ್ಲ. ಅರಿವೆ ಗುರು. ಅಜ್ಞಾನದ ಕತ್ತಲೆ ಕಳೆದಾಗಷ್ಟೆ ಮನವೆಂಬ ಮರ್ಕಟದ ಕುಚೇಷ್ಟೆ ಕುಗ್ಗಲು ಸಾಧ್ಯ. ಮನವೆಂಬ ಮದಭರಿತ ಸಲಗಕ್ಕೆ ಅಂಕುಶ ವಿಕ್ಕಲು ಸಾಧ್ಯ.

ಬಾಳ ಬೇವನ್ನು ಬಗೆಯ ಬೆಲ್ಲದರಲ್ಲಿರಿಸಿದರೆ ಚಿಲುಮೆಯನ್ನು ಏಕೈಕ ಮನೋಭಾವನೆಯಿಂದ ಚಿಮ್ಮಿಸಿದರೆ, ಮನೆ ಮನೆಗಳಲ್ಲಿ ಮಂತ್ರವೆಂಬ ಜ್ಯೋತಿರ್ಲಿಂಗವನ್ನು ಪ್ರತಿಷ್ಠಾಪಿಸಿದರೆ ಭಾವಕ್ಕೆ ಅನುಭವದ ಬೆಡಗನ್ನು ಸೇರಿಸಿದರೆ ಎಲ್ಲವನ್ನು ನಿಷ್ಕಲ್ಮಶ ಭಾವನೆಯಿಂದ ಸಮರ್ಪಿಸಿದರೆ ಶುಭಲಿಂಗವನ್ನು ಆರಾಧಿಸಿದರೆ, ಅದುವೇ ಅನುವರಿದು ಮಾಡುವ ಮಾಟ; ಲಿಂಗ ಜಂಗಮದ ಕೂಟ; ಭವಭಂಗದೋಟ. ಈ ನಮ್ಮ ಕನಸು ನಿರೀಕ್ಷೆಗಳ ನಿಲಾಂಜನದಲ್ಲಿ ನವಜ್ಯೋತಿ ಬೆಳಗಲು ಸಾಧ್ಯ.

ಪ್ರಕೃತಿಯ ನೋಟ...

2009-10-16T22:13:00.000-07:00

ಚಿತ್ರ: ಹರೀಶ್ ಕೆ.ಆದೂರು.

ನಿನ್ನ ಹೆಸರ ಕರೆವುದು.....

2009-10-16T21:50:00.000-07:00

ಕವನ

ಸಂಜೆಯ ಗೋಧುಳಿಯಲಿ

ಕೆಂಬಣ್ಣದ ರಶ್ಮಿಯ ಮಸುಕಿನಲಿ

ನೀ ಹೇಳದೆ ಉಳಿಸಿ ಹೋದ

ಮಾತುಗಳು ಮನದಲಿ ಹೆಪ್ಪುಗಟ್ಟಿ

ಆಳದಲಿ ಮಡುಗಟ್ಟಿದ ನಿನ್ನೊಲವ

ಭಾವಗಳು ಕೆದಕಿ ಎದೆಯ ಕೊಳವ

ನೋವಿನಲೆಗಳಲೆಳುವ ಕಲರವವು

ಕರೆವುದು ನಿನ್ನ ಹೆಸರ ಮತ್ತೆ ಮತ್ತೆ.

ನೀ ಬೆನ್ನ ತಿರುಗಿ ನಡೆದ ಹಾದಿಯ

ಮೇಲಣ ಹೆಜ್ಜೆಯ ಗುರುತಿಗೆ

ಮಾತ್ರ ತಿಳಿವುಂಟು ಮತ್ತೆ ಕೇಳದು

ಈ ಹೆಜ್ಜೆ ಸಪ್ಪಳ:

ಈ ಕಂಗಳಿಗೆ ಅದಾವ ಸುಳ್ಳು ಮೋಹವೋ

ನಾ ಅರಿಯೇ,ನೀ ಸಾಗಿದ ಹಾದಿಯ

ಮೇಲೆ ಹರವಿ ಕಣ್ಣೋಟವ ಕಾಯುತಿಹುದು

ಅಲುಗಿಸದೆ ರೆಪ್ಪೆಯ.

ನಿನ್ನೊಡನೆ ಆಲಿಸಿದ ಮಧುರಗೀತೆಯ

ಆ ಆಲಾಪ ಅಣಕಿಸುವುದು ಏಕಾಂಗಿಯ ಇಂದು.

ನಡುರಾತ್ರಿಯ ನೀರವ ಮೌನದಲಿ

ಅಡರುವುದು ಮನದ ತುಂಬೆಲ್ಲ ನಿನ್ನ ನೆನಪು;

ನೀ ದೂರಾದರು ಆಸೆ, ಮನವಕೊರೆವ

ನಿನ್ನ ನೆನಪು ಮಾಡಲಿ ಆರದ ಗಾಯವ

ಎದೆಯಲಿ,ಜಗವ ಮರೆವೆನು ಆ ನೋವಿನಲಿ

ಮಾತು ಮರೆತ ಗೆಳತಿ!!!

ಎಚ್.ಎನ್.ಈಶಕುಮಾರ್

ದೀಪಾವಳಿಯ ಸ್ಪೆಷಲ್ ರುಚಿಗಳು...

2009-10-16T09:39:00.000-07:00

`` ದೀಪಾವಳಿ ಬಂತೆಂದರೆ ಅದೇನೋ ಸಂತಸ... ಹಬ್ಬದ ಮೊದಲ ದಿನವೇ ಹಬ್ಬದ ಭರ್ಜರಿ ತಯಾರಿಗಳು ನಡೆಯುತ್ತವೆ. ಧಾರ್ಮಿಕ ಶಾಸ್ತ್ರೋಕ್ತ ಆಚರಣೆಗಳಷ್ಟೇ ಹಬ್ಬದ ಅಡುಗೆಗೂ ಪ್ರಾಮುಖ್ಯತೆ ಇದೆ... ಹಬ್ಬದ ಸಂದರ್ಭ ಬೇರೆ ಬೇರೆ ಊರುಗಳಲ್ಲಿ ಬೇರೆ ಬೇರೆಯ ತಿಂಡಿ ತಿನಿಸುಗಳನ್ನು ಮಾಡುವುದು ವಾಡಿಕೆ... ವೈವಿಧ್ಯಮಯ ತಿಂಡಿತಿನಿಸುಗಳೊಂದಿಗೆ ಮನೆಮಂದಿ ಒಟ್ಟಾಗಿ ಕುಳಿತು ಊಟಮಾಡುವುದೇ ಒಂದು ಸಂತಸ...ಇದೀಗ ಹಬ್ಬದ ವಿವಿಧ ಅಡುಗೆಗಳೊಂದಿಗೆ ಮತ್ತಷ್ಟು ರುಚಿ ವೈವಿಧ್ಯವನ್ನು ನಮ್ಮ ಜೊತೆ ಹಂಚಿದ್ದಾರೆ ಈ ಕನಸು.ಕಾಂನ ಬಳಗದ ಶ್ರೀಮತಿ ಸುಮತಿ ಕೆ.ಸಿ.ಭಟ್ ಆದೂರು...

ಅತಿರಸ

ಬೇಕಾಗುವ ಸಾಮಾಗ್ರಿ: ಅಕ್ಕಿ ಹುಡಿ ಅರ್ಧ ಕೆ.ಜಿ. , ಬೆಲ್ಲ ಅರ್ಧ ಕೆ.ಜಿ, ಎಣ್ಣೆ ಒಂದು ಲೀಟರ್.
ಮಾಡುವ ವಿಧಾನ: ದಪ್ಪ ತಳದ ಪಾತ್ರೆಯಲ್ಲಿ ಬೆಲ್ಲ ಹಾಕಿ ಮುಕ್ಕಾಲು ಲೋಟ ನೀರು ಹಾಕಿ ಸಣ್ಣ ಉರಿಯಲ್ಲಿ ಇಡಿ. ಬೆಲ್ಲ ನೂಲು ಪಾಕಕ್ಕೆ ಬಂದಾಗ ನುಣ್ಣಗಿನ ಅಕ್ಕಿ ಹುಡಿಯನ್ನು ಬೆಲ್ಲ ಪಾಕಕ್ಕೆ ಹಾಕಿ ಚೆನ್ನಾಗಿ ಗೊಟಾಯಿಸಿ ಕೆಳಗಿಳಿಸಿ. ತಣಿದ ಮೇಲೆ ಬಾಳೆಲೆಗೆ ಎಣ್ಣೆ ಸವರಿ ವಡೆಯಂತೆ ತಟ್ಟಿ ಕಾದ ಎಣ್ಣೆಯಲ್ಲಿ ಎರಡೂ ಬದಿ ಕೆಂಪಗಾಗುವಂತೆ ಕರಿಯಿರಿ. ಇದನ್ನು ಪೇಪರ್ ಮೇಲೆ ಹಾಕಿದರೆ ಎಣ್ಣೆ ಹೀರಿಕೊಳ್ಳುತ್ತದೆ. ಇದು ತುಂಬಾ ಸ್ವಾದಿಷ್ಟವಾದ ತಿಂಡಿ. ಒಂದು ತಿಂಗಳ ವರೆಗೂ ಕೆಡದೇ ಉಳಿಯುತ್ತದೆ.

ಅವಲಕ್ಕಿ ಉಂಡೆ

ಬೇಕಾಗುವ ಸಾಮಾಗ್ರಿ: ದಪ್ಪ ಅವಲಕ್ಕಿ ಅರ್ಧ ಕೆ.ಜಿ, ಬೆಲ್ಲ ಕಾಲು ಕೆ.ಜಿ, ಗೋಡಂಬಿ , ದ್ರಾಕ್ಷಿ, ಎಳ್ಳು ಎರಡು ಚಮಚ, ಏಲಕ್ಕಿ ಹುಡಿ ಅರ್ಧ ಚಮಚ.
ಮಾಡುವ ವಿಧಾನ: ಅವಲಕ್ಕಿಯನ್ನು ಎಳ್ಳನ್ನು ಬೇರೆ ಬೇರೆಯಾಗಿ ಹುರಿಯಿರಿ. ಬೆಲ್ಲಕ್ಕೆ ಅರ್ಧ ಲೋಟ ನೀರು ಹಾಕಿ ಸಣ್ಣ ಉರಿಯಲ್ಲಿ ಇಡಿ. ನೂಲು ಪಾಕ ಬಂದಾಗ ಹುರಿದ ಸಾಮಾಗ್ರಿಗಳನ್ನು ಗೋಡಂಬಿ, ದ್ರಾಕ್ಷಿ, ಏಲಕ್ಕಿ ಹುಡಿಯನ್ನು ಹಾಕಿ ಚೆನ್ನಾಗಿ ಗೊಟಾಯಿಸಿ. ಕೆಳಗಿಳಿಸಿ. ಬಿಸಿ ಬಿಸಿ ಇರುವಾಗಲೇ ಉಂಡೆಕಟ್ಟಿ.

ಮೈದಾ ಬರ್ಫಿ

ಬೇಕಾಗುವ ಸಾಮಾಗ್ರಿ: ಮೈದಾ ಕಾಲು ಕೆ.ಜಿ, ತುಪ್ಪ ಒಂದು ಲೋಟ, ಸಕ್ಕರೆ ಅರ್ಧ ಕೆ.ಜಿ, ಏಲಕ್ಕಿ ಹುಡಿ, ಚಿಟಿಕೆ ರಂಗಿನ ಹುಡಿ, ಗೋಡಂಬಿ, ದ್ರಾಕ್ಷಿ.

ವಿಧಾನ: ಮೈದಾಕ್ಕೆ ತುಪ್ಪ ಹಾಕಿ ಹಳದಿ ಬಣ್ಣಕ್ಕೆ ಬರುವ ವರೆಗೆ ಹುರಿಯಿರಿ. ಮತ್ತೆ ಬೇರೆ ಪಾತ್ರೆಗೆ ಸುರಿಯಿರಿ. ದಪ್ಪತಳದ ಪಾತ್ರೆಯಲ್ಲಿ ಸಕ್ಕರೆ ಹಾಕಿ ಅರ್ದ ಲೋಟ ನೀರು ಸುರಿದು ಸಣ್ಣ ಉರಿಯಲ್ಲಿ ಇಡಿ. ನೂಲು ಪಾಕಕ್ಕೆ ಬಂದಾಗ ಹುರಿದ ಮೈದಾ, ಗೋಡಂಬಿ, ದ್ರಾಕ್ಷಿ, ಏಲಕ್ಕಿ , ರಂಗಿನ ಹುಡಿ, ಹಾಗೂ ತುಪ್ಪ ಹಾಕಿ ಚೆನ್ನಾಗಿ ಗೊಟಾಯಿಸಿ. ಪಾಕ ತಳಬಿಟ್ಟು ಬಂದಾಗ ತುಪ್ಪ ಸವರಿದ ತಟ್ಟೆಗೆ ಹಾಕಿ ಬೇಕಾದ ಆಕಾರಕ್ಕೆ ಕತ್ತರಿಸಿ, ತಿನ್ನಿ ತಿನ್ನಿಸಿ...

ಬಂತು ಬೆಳಕಿನ ಹಬ್ಬ....

2009-10-16T08:42:00.000-07:00

ದೀಪಾವಳಿ...ದೀಪಗಳ ಹಬ್ಬ... ಜಗತ್ತು ಕತ್ತಲಿನಿಂದ ಬೆಳಕಿನೆಡೆಗೆ ಸಾಗುವ ದಿನ. ಸಾಲು ಸಾಲು ದೀಪಗಳನ್ನು ಬೆಳಗಿ ಎಲ್ಲೆಲ್ಲೂ ಬೆಳಕ ಚೆಲ್ಲುವ ಬೆಳಕಿನ ಉತ್ಸವ.. ತ್ರೇತಾ ಯುಗದಲ್ಲಿ ಶ್ರೀರಾಮನು ರಾವಣನನ್ನು ಸೊಲಿಸಿ ಲಂಕೆಯಿಂದ ಸೀತೆ ಹಾಗೂ ಲಕ್ಷ್ಮಣರೊಂದಿಗೆ ಅಯೋಧ್ಯೆಗೆ ಮರಳಿದ ಪುಣ್ಯದಿನ...ಶ್ರೀಕೃಷ್ಣನು ನರಕಾಸುರನ್ನು ಸಂಹರಿಸಿದ ದಿನ...ಪಾತಾಳ ಸೆರಿದ ಬಲಿಚಕ್ರವರ್ತಿ ಭೂಲೋಕಕ್ಕೆ ಆಗಮಿಸುವ ಅಪರೂಪದ ದಿನ...ಇಂತಹ ಪುಣ್ಯದಿನವನ್ನು ಭಾರತದೆಲ್ಲೆಡೆ ವಿಜೃಂಭಣೆಯಿಂದ ಆಚರಿಸಲಾಗುತ್ತದೆ.

ಸಿಖ್, ಜೈನ ಹಿಂದೂ ಹೀಗೆ ಮೂರು ಧರ್ಮಗಳಲ್ಲೂ ದೀಪಾವಳಿ ತನ್ನದೇ ಆದ ಮಹತ್ವವನ್ನು ಹೊಂದಿದೆ. ಮೂರು ದಿನಗಳ ಕಾಲ ಆಚರಿಸಲ್ಪಡುವ ಈ ಹಬ್ಬದಲ್ಲಿ ನರಕ ಚತುರ್ದಶಿ ಅತ್ಯಂತ ಪ್ರಮುಖ ದಿನ. ಜೈನ ಧರ್ಮದಲ್ಲಿ ಕಡೆಯ ತೀರ್ಥಂಕರ ಮಹಾವೀರರು ಪಾಪಪುರಿಯಲ್ಲಿ ಮೋಕ್ಷಗೊಂಡ ದಿನವಾಗಿ ದೀಪಾವಳಿಯನ್ನು ಆಚರಿಸುತ್ತಾರೆ. ಅದೇ ಸಿಖ್ ಧರ್ಮದಲ್ಲಿ ಆರನೇ ಗುರು ಹರಿಗೋಬಿಂದ್ ಸಿಂಗ್ ಗ್ವಾಲಿಯರ್ನ ಕೋಟೆಯಲ್ಲಿ ಬಂಧಿತರಾದ 57 ಜನ ರಾಜರನ್ನು ಬಿಡಿಸಿತಂದ ದಿನವಾಗಿ

ದೀಪಾವಳಿಯನ್ನು ಆಚರಿಸಲಾಗುತ್ತಿದೆ.
ದೀಪಾವಳಿಯ ಹಬ್ಬದ ಕುರಿತಾದ ನಂಬಿಕೆಗಳು ಹಲವು...ಪ್ರತಿಯೊಂದು ನಂಬಿಕೆಯೂ ದೀಪಾವಳಿ ವಿಜಯದ ಸಂಕೇತವೆಂಬುವುದನ್ನು ಸೂಚಿಸುತ್ತದೆ..ಎಲ್ಲೆಲ್ಲೂ ಪಟಾಕಿಗಳನ್ನು ಸಿಡಿಸಿ ವಿಜೃಂಭಣೆಯಿಂದ ವಿಜಯೋತ್ಸವವನ್ನು ಆಚರಿಸಲಾಗುತ್ತದೆ.ಇಂತಹ ವಿಜಯದ ಹಬ್ಬ..ಬೆಳಕಿನ ಹಬ್ಬ ನಿಮ್ಮಲ್ಲರ ಬಾಳಲ್ಲಿ ಸುಖ ಶಾಂತಿಯನ್ನು ತರಲಿ ಎಂಬ ಆಶಯ
ನಮ್ಮದು...ಸರ್ವರಿಗೂ ದೀಪಾವಳಿಯ ಶುಭಾಶಯಗಳು.....

- ಅಕ್ಷತಾ ಭಟ್. ಸಿ.ಎಚ್.